CEBU, Philippines – Patay ang usa ka negosyante og kopras human gipusil sa wala mailhing lalaki samtang nagkaon sa karenderya sa dalan Lopez Jaena sa barangay Subangdaku, dakbayan sa Mandaue alas 6 pasado ang takna kagahapon sa buntag.
Ang biktima mao si Lemuel Hortizano, 38, taga Suba, dakbayan sa Danao ug supplier sa Bambi Edible Oil og kopras nga nagbase sa barangay Subangdaku sa maong dakbayan.
Si PO1 Cristito Raboy sa Homicide Section sa Mandaue City Police Office (MCPO) miingon nga nagkaon ang biktima kuyog sa stay-in worker niining si Dindo Gumbao, 26, dihang nahitabo ang pagpamusil.
Duha ka tawong nagsakay og motorsiklo nga nagsul-ob og crash helmet ang miabot ug ang angkas miduol sa biktima ug mipusil sa ulo niini ginamit ang kalibre .45 pistola.
Si Gumbao kinsa nakalitan sa kalit nga pagboto sa armas gikan sa iyang luyo ang dali kaayong nakabarog ug mikaratil og dagan sa pagluwas sa kaugalingon.
Ang biktima mo-deliver unta sa maong dapit alang sa pag-deliver sa iyang kopras apan sirado pa ang maong kumpanya niadtong higayona maong namahaw una sila.
Human sa maong pagpamusil dali nga mibalik og sakay sa motorsiklo ang wala hiilhing lalaki ug mipabulhot paingon sa lungsod sa Consolacion.
Wala pa matino sa kapolisan ang motibo sa pagpatay ingon man kun si kinsa ang mga mamumuno. - Romeo Limpangog (BANAT NEWS)