Tulisang balut vendor gikiha

CEBU, Philippines – Usa ka balut vendor gipasakaan og kasong pagpanulis kagahapon human niya tulisa ang usa ka 19 anyos nga dalaga niadtong Sabado sa kaadlawon didto sa palibot sa Chong Hua Hospital ning dakbayan sa Sugbo.

Ang akusado giila sa kapulisan nga si Tomas Sangatan, 22 ,minyo nga taga A. Lopez, barangay Labangon ning dakbayan, tigbaligya og balut samtang ang biktima mao si Florejane Dalogdog, 19, taga Cotabato, apan temporaryong nagpuyo sa duol sa Chong Hua..

Ang biktima naglakaw sa nahisgutang dapit niadtong Sabado sa kaadlawon dihang giduol siya sa suspetsado ug gitionan siya og kutsilyo uban sa pagdeklarar nga tulis ug gipangayo ang iyang cellphone.

Samdan sa walang kamot ang biktima dihang gidunggab siya sa suspetsado bisan kun wala siya mopakita og pagsukol niini.

Maayo nalang kay may mga grupo sa mga batan-on nga nakaalinggat sa hitabo, gigukod nila ang suspetsado ug dihang nakorner, gitabangan kini nila og kulata una nila ihatod ngadto sa buhatan sa kapolisan.

.Ang biktimang si Dalogdog mibahad nga dili niya iatras ang kaso nga iyang gisang-at batok sa suspetsado bisan pa sa pagluhod-luhod niini sa pagpangayo og pasaylo ug kalooy sa biktima. - Guam P. Logroño (BANAT NEWS)