CEBU, Philippines - Patay nang nahidangat sa tambalanan ang usa ka trabahador sa Pier 5 human gidunggab sa iyang silingan tungod sa selos kagahapon sa kaadlawon diha sa sitio Kalinaw barangay Carreta.
Si Renie Villaronte,19, gidunggab patay sa iyang kaubang trabahante ug silingan nga si Stephen John Yosores.
Sumala pa sa imbestigasyon sa kapolisan, gikatahong nagselos ang suspek kang Villaronte human niya kini masakping nagkuyog sa iyang kapuyo nga nagdala og mga dagkong bag ug nagpaabot og masakyan diha sa dalan Osmeña Blvd. pipila ka mga oras una pa ang pagpanunggab.
Dihang gikomprontase sa suspek ang kapuyo nga papaulion nagdumili ang babaye ug gumikan sa kasuko maoy gipahimungtan si Villaronte ug dayon gidunggab.
Ang biktima bisan samaran sa nagkadaiyang parte sa kalawasan nakahimo pa kini pagdagan sa panimalay sa usa ka Miriam Estrada Corsa ug nagpakitabang.
Ang biktima daling gitabang ug gidala sa Cebu City Medical Center apan gideklarar kining dead on arrival.
Sumala pa sa kapolisan posibleng nagselos ang suspek nga mikuyog na sa biktima ang iyang kapuyo. - Lesley Caminade (BANAT NEWS)