2 gipamusil

CEBU, Philippines - Usa ang patay samtang usa ang naangol sa duha ka insidente sa pagpamusil sa dakbayan sa Sugbu kagahapon sa kaadlawon.

Ang namatay giilang si George Mavreleon,36, taga barangay Marigondon sa dakbayan sa Lapulapu apan mibisita diha sa balay sa iyang igsuon sa sitio Bario Wacwac sa barangay Suba pasado alas 6 kagahapon sa buntag.

Si Mavreleon nakaangkon og samad pinusilan sa suwang ug tuong bahin sa dughan hinungdan sa iyang hinanaling kamatayon.

Sa pasiunang imbestigasyon sa kapolisan nasayrang usa ka Boy Delima maoy mipahibalo sa igsuon sa biktima nga si Felipe nga ang iyang igsuon nagbuy-od gawas sa ilang panimalay.

Hinungdan nga dali niyang gisusi ang biktima ug mao nalay iyang nasayran nga nagkadugo kini ug gidali niya’g dala sa Cebu City Medical Center apan gideklarar kining dead on arrival.

Matud pa ni PO3 Geoffrey Gutual sa Cebu City Police Office sa Homicide Section, ilahang gisubay karon ang anggulong may kalambigitan sa illegal drugs gumikan kay nakakuha sila og impormasyong gikatahong magsige og pangayo’g drugas ang biktima.

Samtang sa laing pagpamusil, usa ka 15-anyos nga batan-ong sakop sa gang ang naangol sa walang bukton human gipusil sa duha ka mga gidudahang miyembro sa ribal nga gang diha dalan V. Gullas St. sa barangay Sto.Niño sa milabay’ng gabii.

Ang mga suspek giilang sila si Niel Jo Caballes,18 ug Albert Navarro,22, pulos taga sitio Kanaas Banawa sa barangay Guadalupe.

Sumala pa sa kapolisan nagkuyog ang biktima nila ni Reginald Cabarubias, 30, ug usa ka batan-on ug gipasanginlan sa grupo sa mga suspek nga milabni sa cellphone sa kapuyo ni Navarro tulo ka semana na ang nakalabay.

Si Navarro daling nagpatabang sa higalang si Caballes kinsa nagdala dayon og armas, apan dihang ilang gikomprontase ang grupo giingong daw mibunot kini og armas maong gipamusil kini ni Caballes.

Apan ang armas makausa ra mibuto ug naigo sa bukton ang 15-anyos. - Lesley Caminade (BANAT NEWS)