Inadlaw nga drug test makaayo

CEBU, Philippines – Ang pagpalagpot sa ilang trabaho isip drayber sa ilang mga sakyanan maoy labing bug-at nga silot nga ipahamtang alang sa mga drayber nga masakpan nga nalambigit sa ginadiling drugas sa random drug test nga pagahimoon sa Land Transportation Office (LTO) 7.

Si Benjamin Ryan Yu nga chairman sa Cebu Integrated Transport Cooperative (CITRASCO) nga nahinabi sa Banat Manobela kagahapon ang mipadayag niini.

Matud pa niya nga dili lig-ong basehanan nga nalambigit ang drayber sa paggamit sa ginadiling drugas kun kanunay kini kusog nga mopadagan sa gimanehong sakyanan.

Dugang pa niya nga daghang drayber nga magmaneho ang kusog gayod nga mopadagan sa ilang sakyanan apan wala magpasabot nga nalambigit kini sa paggamit og shabu.

Si Yu nga nahinabi sa Banat Manobela ang nag-awhag sa LTO-7 sa pagpadayon sa random drug test nga ilang gihimo sa miaging bulan.

Giisip niya nga epektibo kaayo ang random drug test sa LTO alang sa pag-ila sa mga drayber nga nalambigit sa paggamit sa ginadiling drugas.

“Alang nako epektibo kaayo ang random drug test nga pagahimoon sa LTO-7 kay mailhan man ug makuha man ang tinuod nga resulta alang sa pag-ila kun user ba gyod og shabu ang drayber.”

 “Among gihangop sa CITRASCO ang matag adlaw nga random drug test sa LTO 7, kay dako kaayo kini og ikatabang sa pag-ila sa mga drayber nga naggamit og illegal nga drugas.” - Romeo T. Limpangog (BANAT NEWS)