Dispatcher gipusil namatay

CEBU, Philippines – Namatay ang usa ka dispatcher human pusila sa wala hiilhing mamumuno sa dalan A.C. Cortes Avenue, barangay Alang-Alang, dakbayan sa Mandaue, sa miaging Biyernes sa hapon.

Ang biktima mao si Edwin Buayaban, 33, ulitawo, nga lumad nga taga Cawayan, Masbate, apan temporaryong nagpuyo sa barangay Tingob sa dakbayan sa Mandaue.

Si PO3 Romel Lim sa homicide section sa Mandaue City Police Office (MCPO) mibutyag sa Banat News nga samtang nanawag ang biktima og mga pasahero aron pasakyon sa nag-parking nga mga traysikol sa maong dapit, kalit lang giduol sa usa ka tawong armado ug gipusil ang biktima.

Ang biktimang naigo sa walang dughan nahagba sa yuta ug nabugtoan dihadiha sa kinabuhi.

Samtang ang kriminal dali usab kaayong nakasibat gikan sa maong lugar sakay sa iyang motorsiklo.

Si PO3 Lim miingon nga nagpabilin pang blangko ang ilang buhatan sanglit walay testigos nga makabutyag sa ngalan sa kriminal. - Romeo T. Limpangog (BANAT NEWS)