CEBU, Philippines – Nagkahiusa karon ang mga ginikanan sa dakbayan sa Mandaue sa pagpasiugda og Brigada Eskuwela isip kabahin sa mga pagpangandam sa pagbukas sa klase karong bulan sa Hunyo.
Si Jimmy Vasquez nga maoy presidente sa Parents Teachers Community Federation maoy nangulo sa mga ginikanan nga mitambong sa maong panagtigom kagahapon.
Sa maong kalihokan, migahin og P6 milyones ang kagamhanan sa maong dakbayan nga kuhaon gikan sa Special Education Fund (SEF) samtang ang Department of Education (DepEd) migahin usab og P2 milyones.
Ang gastohan ning kuwartaha mao ang pagpaayo sa mga pansayan sa matag eskuylahan, atop nga nabuslot na, pag-ayo sa mga lingkoranan nga nagusbat na ug uban pang ayuhonon sa matag lawak tun-anan.
Kini aron pagsiguro nga dili na matugaw ang mga tinun-an sa unang adlaw sa ilang klase ug hangtod nga matapos ang tibuok tuig nga klase sa tulunghaan.
Lahi sa kaniadto nga ang unang adlaw sa ilang klase, igahin sa kabataan sa pagpanghinlo sa sulod ug sa palibot sa eskuylahan, ug uban pang gimbuhaton tungod kay ang eskuylahan kaniadto wala pay Brigada Eskuwela. - Romeo T. Limpangog (BANAT NEWS)