Young supak sa gusto ni Lapus

CEBU, Philippines – Dakong supak si Cebu City Hall Education Consultant Joy Augustus Young nga ipagamit sa Department of Education (DepEd) ang pinulungan sa usa ka lugar sulod sa classroom sa pampublikong mga tunghaan sa nasud.

Ang kalihim sa DepEd nga si Jesli Lapus gikatahong mitugot sa pagpagamit sa dialect sa usa ka dapit alang sa mga tinun-an sa Grade 1 hangtud sa Grade 3.

Kini aron dili maglisod ang mga tinun-an pagkat-on sa ilang leksyon tungod kay ang pinulungan mismo niini ang gigamit sa mga magtutudlo ug kini sugdan pagpatuman sa umaabot nga tuig-tingtungha.

Giklaro hinuon ni Young nga siya wala masayod sa maong plano apan iyang gitataw nga siya mismo dili pabor sa nahisgutang lakang.

Nabalaka ang education consultant nga mosamot og kaubos ang kalidad sa edukasyon sa nasud kung gamiton ang dialect sa pagtudlo.

Apan matud ni Lapus nga sa ilang gihimong pagtuon daling makat-on ang mga tinun-an kung ang pinulungan niini maoy gigamit sa pagtudlo tungod kay dugay makat-on sa leksyon ang mga tinun-an kung dili niini sinati ang pinulungan ug mapugos lang sa pagkat-on sa formula.

Gipadayag hinuon ni Young nga mahimong gamiton ang Binisaya sa Kinder ug Grade 1 sa publikong mga tunghaan sa dakbayan apan kinahanglang di kini hangtud sa hangtud. – BANAT NEWS