Biaño nalipay nga gi-"libel" siya

CEBU, Philippines – Gihangop ni Majority Floor Leader Victor Biano sa konseho sa dakbayan sa Mandaue ang bahad ni Superintendent Vicente Mersan Premne, luyo-luyong hepe sa kapolisan sa maong dakbayan, nga ikiha siya’g (Biano) kasong libelo.

Pwerting pungota ni Premne dihang giakusahan siya ni Biano pinaagi sa usa ka resolsuyon nga siya kuno may kabit nga babaye, protektor sa mga negosyante og ilegal nga druga ug sa mga tigpalusot og mga produkto sa petrolyo.

Midugang si Premne nga gawas nga nakagusbat kini sa iyang pagkatawo ug sa iyang dungog, mihugo siya kay dili na siya makatulog gumikan sa hilabihang kauwaw ug maglisod na siya pag-atubang sa mga tawo nga nakaila kaniya ug nasayod sa mga pasangil ni Biano batok kaniya, busa naghatag og kahasol sa iyang lawas ug kinabuhi.

Busa sa kasong libelo nga iyang gisang-at batok kang Biano, pabayron ni Premne ang konsehal og P5 milyones nga danyos gumikan sa pagpakauwaw niini kaniya.

Apan sa bahin ni Biano, nagpasalamat siya kang Premne kay kuno ang pagsang-at og kiha niini iyang katungod ni Premne aron sa pagdepensa sa iyang kaugalingon nga wala mogamit og kusog batok kaniya.

Labing gipasalamatan ni Biano si Premne kay wala kini mohimo og lakang aron panimaslan siya pinaagi sa pag’frame-up’ kaniya sama kuno sa gihimo ni Premne ngadto kang Dr. Paulus Canete, ang Presidente sa Mandaue City College.

Hinuon wala batia og bisan gamay nalang nga kabalaka si Biano niining bahad ni Premne, kay gawas nga siya usa ka konsehal , usa pa gayud siya ka banggiitang abogado sa tinuoray nga kinabuhi.

Sayo niini, mipalabang og resolusyon si Biano sa konseho sa dakbayan nga nag-awhag kang Chief Supt. Rolando Terte nga ipatangtang si Premne sa katungdanan tungod kuno sa mga illegal nga buhat niini nga nakadaot pag-ayo sa iyang (Premne) moral nga makapagan sa tibuok kagamhanan sa dakbayan sa Mandaue.

Hinuon ang tanang pasangil ni Biano, pulos gipanghimakak ni Premne. – BANAT NEWS