CEBU, Philippines – Nadakpan ang unom ka mga suspek sa pagpatay sa usa ka nurse sa Medillen Medical Clinic sa lungsod sa Medillen nga unang gi-blotter sa kapulisan nga usa lang ka traffic accident sa Lamintak Norte sa maong lungsod niadtong miaging tuig.
Ang gipangdakop subay sa warrant of arrest sa kasong murder nga giluwatan ni RTC Branch 61 judge Antonio Marigomen sa Bogo City mao sila si Agapito Binlot, 61, usa ka magtutudlo; anak niining si Reynaldo Binlot,32; Elrits Daanton, 22; Ritchie Tomabini, 34, usa ka factory worker; Ulises Lanoria, 27,usa ka technician ug Leanor Daanton, 59, pulos molupyo sa barangay Lamintak Norte Medellin.
Matud ni PO3 Paquito Soon sa Medillen Police dihang nahinabi sa Banat News gidakop ang mga suspek pinangulohan sa ilang hepe nga si Insp. Bonifacio Arriesgado niadtong Biyernes sa alas 8:00 sa gabii human madawat ang warrant of arrest nga giluwatan sa korte.
Ang mga suspek maoy gitumbok nga mipatay sa biktimang si Fredirick Lobetania, usa ka nurse sa maong tambalanan nga lumad nga taga lungsod sa San Remegio.
Si Lobetania una nang gi-blotter sa kapulisan sa Medillen nga namatay sa traffic accident human giingong mibangga ang gisakyang motorsiklo niini sa putol nga kahoy daplin sa karsada sa maong lugar samtang paingon kining motrabaho.
Apan ang amahan sa biktima nga si SPO3 Elvie Lobetania usa usab ka imbestigador ug nadestino sa Bogo City Police diskumpiyado sa maong panghitabo hinungdan nga nipahigayon og linaing pakisusi.
Matud ni SPO3 Lobetania atol sa interview dunay tulo ka mga saksi nga nakakita nga giatangan sa mga suspek ang iyang anak niadtong higayuna ug paghunong niini gitabangan nila kini og puspos.
Human matumba giguyod kini daplin sa dagat ug didto gipatay ug pagkahuman gibalik pagpasakay sa motorsiklo aron mogawas nga aksidente ang maong panghitabo.
Matud pa ni SPO3 Lobetania gawas sa tulo nila ka mga saksi nga nakakita sa maong panghitabo nagpakita usab ang resulta sa autopsy nga gipahigayon sa PNP Crime Lab pinaagi ni Dr. Nestor Satur nga dunay dili momenus 21 ka mga samad pinusposan og kahoy nga dunay lansang ang ulo sa biktima ug ubang bahin sa kalawasan nga maoy hinungdan sa pagkamatay niini.
Gidugang ni SPO3 Lobetania nga dugang niyang nahipos nga impormasyon nga gisuyaan ug gi-selosan ang iyang anak sa suspek nga si Ritchie Tomabini human natahap nga dunay relasyon ang biktima sa asawa niini nga si Jonna Tomabini.
Si Jonna Tomabini gikatahong usa usab ka nurse ug kauban sa trabaho sa biktima sa maong tambalanan.
Ang mga suspek kasamtangan karung gibalhog sa detention cell sa kapulisan sa lungsod sa Medillen. - Darrel Carumba (BANAT NEWS)