Mipatay sa OFW wa dakpi

CEBU, Philippines – Ang kapolisan sa dakbayan sa Talisay naniid karon sa giingong duha ka tawo kinsa kauban sa paglubong sa gipatay nga Overseas Filipino Worker (OFW) nga nakuykoyan sa mga polis didto sa likod sa iyang (biktima) balay sa sitio Litmon, barangay Poblacion, dakbayan sa Talisay sa miaging semana.

Ang lawas ni Teresita Dungog de Guzman baho ug nagkadugta na dihang gikawot sa mga kapolisan.

Ang suspek sa pagpatay kang Teresita mao ang iyang kapuyo nga si Raymundo Barangan ug ang maguwang niining nailhan lang nga “Tata” kinsa padayon pa karon sa pagtago-tago.

Si Superintendent Henry Binas, hepe sa Talisay City Police Station sa pakighinabi sa Banat News nagkanayon nga gawas sa managsoong Barangan, aduna pay laing duha ka tawo kinsa giingong mitabang sa paglubong sa biktima.

Kining mga tawhana karon ang gipanid-an sa kapolisan sa Talisay kun hain kini magtago-tago aron mataral sa hukmanan ug kapahamtangan og tukmang silot.

Matud ni Binas nga pormal na nga naduso ang kasong murder ngadto sa piskaliya sa siyudad batok sa magsuong Barangan ug sa laing duha ka wala hiilhing lalaki niadtong Martes.

Gipasabot ni Binas nga ang mga suspek ipaubos una sa preliminary investigation ug hatagan pa kini og napulo ka adlaw sa pagtubag sa mga pasangil batok kanila.

Midugang si Binas nga kung masuta sa piskal nga dunay probable cause o igong kapasikaran ang maong kiha, isang-at dayon sa piskal ang maong kasayuran sa kaso ngadto sa korte aron kaluwatan og orden de aresto ang mga sinumbong.

Ug kung ang mga suspek dili moatubang sa ipahigayong preliminary investigation, ipadayon sa piskal ang pagbista sa maong kaso subay sa mga ebidensya nga gisumitir sa mga polis aron molusot dayon ang warrant of arrest. - Brenda D. Batuto (BANAT NEWS)