Army gikuotan og P12 mil

CEBU, Philippines – Usa ka miyembro sa Philippine Army nabiktima sa panguot samtang siya nagsuroy-suroy sa usa ka mall ning dakbayan sa Sugbo sa miaging Domingo.

Ang biktima mao si Joy dela Peña, 29, nga anaa sa Speaker’sa Bureau sa 3rd Civil Relations Service ug nagserbisyo sulod na sa   5 ka tuig sa Philippine Army.

Ang biktima mibutyag sa Banat News nga gikan siyang nag-withdraw og kuwarta sa ATM sulod sa mall ug nakurat nalang siya dihang pagbayad niya sa counter sa iyang gikompra, naabli na ang seper sa iyang gamay nga bag ug wala na diha iyang P12 mil nga kuwarta.

Matud pa sa biktima nga mihuyhoy ang iyang abaga niadtong higayona kay imbis gisuroy niya ang iyang anak ug gipamalitan og mga biste, sapatos ug uban pa, wala na hinuon matuman tungod kay wala naman siya’y kuwarta.

Midangop pa siya sa tagdumala sa maong tindahan, ug gisusi kun nakita ba kini sa ilang spy camera, apan igo lang siyang giingnan nga dili tanang mga butang makita sa ilang spy camera gawas lang kun tua gyud kini mahitabo sa atubangan niini. 

Ang biktima wala gyu’y nahimo gawas sa pagpa-blotter sa maong hitabo didto sa Mabolo Police Station. – BANAT NEWS