CEBU, Philippines – Gibutyag ni Acting Cebu City Mayor Michael Rama nga andam na ang tanang mga pangulo sa nagkalainlaing departamento sa gobyerno alang sa umaabot nga pagbukas sa klase karong Hunyo.
Matud ni Rama nga usa sa labing unang nangandam mao ang kapolisan kinsa maoy mopatunhay sa kalinaw sa maong higayon.
Kini aron santaon ang mga kriminal nga mopahimulos sa maong higayon nga magdaghan ang mga estudyante ning dakbayan, matud pa ni Rama.
Gawas sa mga tinugyanan sa Department of Education nga maoy magsilbing frontliner sa maong higayon , gisangpit usab ni Rama ang mga kapitan sa barangay nga moabag sa kapolisan sa pagbantay batok sa mga kriminal.
Usa sa gipatutokan ni Rama sa mga kapolisan ug mga opisyal sa barangay mao ang pagpanglabni, tulis, ug bisan ang bandalismo.
Kining mga matanga sa krimen maoy kasagarang yano-yanuhon lang paghimo sa mga kriminal ning dakbayan ug mosamot na kung tingdaghan sa tawo, matud pa ni Rama.
Miingon si Rama nga kun magkadungan ang puwersa sa kapolisan ug kabarangayan batok sa mga kriminal, hayan nga dili makahuygo kining matanga sa mga tawo sa paghasol sa katilingban.
Midugang si Rama nga ang pagbantay sa kahusay sa umaabot nga pagbukas sa klase gikinahanglan kaayo aron dili mabalda ang pagtuon sa mga estudyante kay gikinahanglang molambo ang ilang edukasyon pag-ayo aron magamit kini sa panerbisyo publiko ilabi na kun magplano sila sa pag-intra sa politika sa panahong modagko na sila. - Genevieve F. Dolino (BANAT NEWS)