Konbiktadong opisyal nasagmuyo

CEBU, Philippines – Gikasagmuyo sa kanhi City Treasurer ug karon City Assessor sa siyudad sa Sugbu, Eustaqiuo Cesa, ang iyang pagkakonbikto sa kasong graft uban sa laing tulo niya ka kauban.

Ang Sandiganbayan misentensya nilang Cesa, kanhi City Administrator Alan Gaviola, kanhi Cash Division Chief Benilda Bacasmas ug kanhi City Accountant Edna Jaca nga mabilanggo og 12 ngadto sa 15 ka tuig gawas nga pabayron og kapin sa P9.8 milyones.

Kini tungod sa giingong pagtugot sa nahisgutang mga opisyal nga maka-cash advance ang usa ka kanhi disbursing officer nga si Luz Gonzales sa nahisgutang kantidad niadtong 1995 hangtud sa tuig 1998 nga wala mabayri.

Matud ni Cesa nga sila moduso og mosyon sa desisyon sa Sandiganbayan pinaagi sa ilang abogado nga si Attorney Vicente Espina Jr.

Nahibulong si Cesa nga mikabat og tulo ka tuig ang wala kabayring utang ni Gonzales samtang ang COA giingong mopahigayon og accounting matag tuig.

Malaumon ang City Assessor nga dawaton sa hukmanan ang ilang mga argumento sa iduso nga mosyon ug bakwion ang desisyon niini.

Sila si Gaviola ug Bacasmas dili na konektado sa City Hall samtang si Jaca naghambin karon sa iyang sakit nga cancer ug anaa sa usa ka pribadong tambalanan sa dakbayan.

Lakip sa nasubo sa desisyon sa Sandiganbayan mao si acting mayor Michael Rama nga nakamatikod usab og “inconsistencies” sa desisyon. Giingong nahitabo ang unliquidated cash advances ni Gonzales ubos sa administrasyon ni kanhi mayor Alvin Garcia.

Ang labaw nga gikabalak-an sa acting mayor mao si Jaca tungod kay kini giingong nagpabilin pa sa tambalanan tungod sa iyang balatian.

Apan nanghinaut si Rama nga ang gidangatan sa mga gipangkonbikto himuon usab nga panag-ingnan sa mga kawani sa City Hall. – BANAT NEWS