Bata gibaligya sa papa

CEBU, Philippines – Usa ka lalaki ang gidakop human kini giingong misuway og baligya sa iyang usa pa ka tuig ug tulo ka buwang anak nga lalake sa kantidad nga lima ka libo ka pesos ngadto sa mga residente sa barangay Lorega-San Miguel niadtong milabay’ng gabii.

Ang gidakop nga amahan mao si Rommel Galupa, 36, taga sitio Enriquez sa barangay Labangon. Si Galupa dunay kapuyo sulod sa walo na ka tuig nga giilang si Rhea Deluvio, 28, ug duna na silay lima ka mga anak.

Apan giingong lima na ka bulan ang nakalabay gibiyaan kini ni Deluvio human ang naulahi giingong mikuyog kini og laing lalaki.

 Sa pakighinabi sa Banat News kang Lydia Cabahug, in-charge sa Department of Social Worker Service sa barangay Lorega, kaniadto sa bag-o pa magbuwag ang suspek ug kapuyo magkasinabot ra silang maghulmanay sa maong bata.

Ang maong bata ug upat ka mga igsuon diha moipon sa ilahang inahan sa balay sa igsuon sa babaye.

 Apan dangtan pipila ka mga adlaw kanunay nang maghisgot ang suspek nga iyahang pangitaan og buyer ang bata aron ang halin magamit nila sa ilang panginahanglan tungod sa kalisod karon sa ilang panginabuhi.

Ang suspek sumala pa sa DSWS walay trabaho ug kanunay rang mag-estambay ug magsuroy-suroy.

Niadtong milabay’ng gabii, samtang wala diha ang inahan sa mga bata, giadto sa suspek ang panimalay sa igsuon sa iyang kanhi kapuyo aron hulman ang bata.

Ang bata gidala niini sa barangay Lorega-San Miguel ug miduol sa tulo ka mga residente ug mitanyag nga iyang ibaligya kanila ang iyang anak sa kantidad nga P5 mil.

Duha sa maong mga gitanyagan nga gikahinabi sa Banat News nga di buot mapublikar ang mga pangalan gawas sa pangalang “Onyot” ug “Edith” nagkanayon nga daw nibaligya ra og ordinaryong butang ang suspek.

Matud pa nila nga gi-anunsyo pa niini ngadto sa mga tawo kung si kinsay interesadong mopalit og bata. Nagtuo ra silang “binuang” o ba kaha gara-gara ra ang tanyag sa suspek hinungdan nga ilang gisakyan ug gipangutana hain man ang batang buot niining ibaligya.

Diha-diha ang suspek gikatahong mitubag kanila nga “huwata ko diha kay ako kuhaon” ug nagdali sa paglakaw apan dangtan ang pipila ka minutos mibalik na kini dala ang bata.

Ang duha giingnan sa suspek nga P5 mil ang presyo sa iyang anak ug dihang gipangutana kung unsaon niini ang halin, kini mitubag nga iyang ipamelete sa paglarga ngadto sa Manila.

Sumala pa sa duha nga daw hubog o ba kaha high sa ginadiling drugas ang suspek niadtong tungura hinungdan nga ilaha kining gisakay-sakayan og estorya ug nagpatabang sa usa ka kawani sa barangay hangtud nga naabot sila sa barangay hall ug daling giaresto.

Sa report sa Balitang Bisdak kagahapon ang inahan sa bata nga si Deluvio mipatim-aw sa DSWS ug giangkong iyaha kining anak apan gihimakak nga mikuyog siya sa laing lalaki sukwahi sa pasangil sa kanhi kapuyo.

Kagahapong adlawa gipasakaan og kasong kalapasan sa Republic Act 7610 kon Child Abuse ug gibalhog na sa Cebu City Jail human wala makabutang og piyansa.

Ang bata ibutang sa kustodiya sa Department of Social Welfare Services (DSWS) hangtud nga makapakita og pruweba si Deluvio nga iyaha gyung anak ang bata. – BANAT NEWS