CEBU, Philippines – Patay ang usa ka apprentice mate sa usa ka shipping firm human mabunal ang ulo sa giluwanang tugboat atol usab sa paglabay sa usa ka fastcrafts sa Pier 7 alas 10 pasado ang takna sa miaging gabii.
Ang biktima mao si Abraham Capangpangan, 23, taga barangay Sabang sa dakbayan sa Danao.
Si PO3 Romel Lim sa homicide section sa Mandaue City Police Office (MCPO) nga nahinabi sa Banat News miingon nga nahinanok na og katulog ang biktima dihang nahigmata kini sa kusog nga pagtay-og sa giluwanang tugboat atol sa paglabay sa usa ka fastcraft dili layo sa ilang gihimutangan.
Gituohang gialimungawan ang biktima ug nagdali pagbarog ug kalit nalamba una ang ulo nga napantok sa salog nga maoy nakaingon sa pagkasamad niini. Matud pa ni PO3 Lim nga ang mga crew sa maong tugboat daling mihatod kaniya sa Mandaue City District Hospital apan gideklarar kining patay na nga nahidangat kanila.
Gikatakdang ipa-autopsy ang patayng lawas niini aron pagsuta kung duna bay foul play sa kamatayon niini. - Romeo Limpangog (BANAT NEWS)