Namrenda'g luna 'sikop

CEBU, Philippines – Usa ka ginang nga gipasanginlang mangingilad ang gidakop sa mga sakop sa Criminal Investigation and Detection Group (CIDG-7) mga alas 10:00 pasado sa buntag kagahapong adlawa diha Legaspi St., duol sa Patria de Cebu.

Ang mga sakop sa CIDG-7 nga sila si SPO1 Willard Selebio ug PO3 Arnold Bocayong misikop kang Nimfa Canizares, 32, taga Labuca St., Cansoyong, dakbayan sa Talisay.

Ang pag-aresto pinasikad sa warrant of arrest nga gi-isyu ni Judge Gilbert Moises sa Regional Trial Court branch 18 ug may piyansa nga P40 mil pesos alang sa iyang temporaryong kagawasan.

Usa ka Constancia Labao, 70, taga barangay Mambaling ning dakbayan ang mireklamong niadto pang Marso 28, 2008 gi-prenda sa akusado ang iyang yuta diha Banilad sa Mandaue sa balor nga P408 mil pesos ngadto sa usa ka lending company nga nahimutang sa Rosalina St., V. Rama Avenue sa barangay Guadalupe.

Matud pa niini nga ang maong yuta adunay gidak-on nga 275 square meter nga mokantidad na og P3 milyones, lakip nga nakuha sa akusado ngadto kaniya mao ang alahas nga mokantidad og P1 million pesos.

Gibutyag niini nga ang suspek gipaila-ila kaniya sa usa ka Mary Ann Pepino nga iyang nakaila nga diay gidudahan niyang parehong nagkunsabo pag-ilad kaniya.

Sumala pa niini nga kumpiyansa siya sa maong akusado nga magsige og duaw sa ilang panimalay hinungdan nga nakuha niini ang mga dokumento sa ilang yuta ingon man alahas nga gisulod sa attaché case.

Apan iyang nasakpan karon lang bag-o nga duna kini kopya mga dokumento sa iyang yuta hinungdan nga iyaha kining gikomprontase kabahin niini.

Dihang iyang gidala ang mga dukomento sa City Assessors Office sa dakbayan sa Mandaue nasutang mga peke ang maong dokumento ug dihang gikumparar sa orihinal.

Apan nakurat nalang siya dihang ang mga tinugyanan sa Assessors Office mitug-an kaniyang naprenda na ang maong luna niadto pang miaging tuig ug dihang ilang gisubay nasuta nga ang akusado maoy nikopya sa ilang mga pirma. - Guam Logroño (BANAT NEWS)