Ceres vs. traysikol; 1 patay

CEBU, Philippines – Patay diha-diha ang drayber og traysikol ug naangol ang pasahero niini human kini aksidenting nakigbinanggaay sa gikasugat niining Ceres bus didto sa kurbadahon nga karsada sa barangay La Purisima Conception, siyudad sa Bogo niadtong Miyerkules sa alas 9:40 sa gabii.

Ang namatay diha diha mao ang drayber sa traysikol nga si Julius Enoc, molupyo sa barangay Samosa lungsod sa Tabogon samtang naangol ang pasahero niini nga si Marjed Puyos, 27, ulitawo ug molupyo sa barangay Cayaan, Tabogon.

Samtang ang drayber sa gikabangga niining Ceres bus dunay plaka nga GWH-815 mao si Joel Brigoli, 41, minyo ug molupyo sa barangay Cambaro, siyudad sa Mandaue.

Matud ni SPO2 Rogel Layson, traffic investigator sa Bogo Police Station sa dihang nahinabi sa Banat News ang Ceres bus gikan sa dakbayan sa Sugbo ug paingon sa Hagnaya San Remegio samtang ang traysikol gikan nga nagpatubil og gasolina sa barangay Taytayan ug paingon sa Bogo.

Matud ni SPO2 Layson wala makabantay ang duha ka sakyanan ug medyo dunay gikusgon ang pagpadagan niini hinungdan nga nagkabangga gyud kini pag-abot sa kurbadahon nga lugar.

Matud ni SPO2 Layson tungod sa kakusog sa impact nalabay ug didto motugpa sa semento nga karsada ang drayber sa traysikol ug maayong pagkadakdak ang ulo niini samtang ang pasahero napasuk sulod sa sidecar sa traysikol nga nakaangkon usab og grabeng kadaot.

Gisuwayan unta pagtabang sa mga molupyo sa maong lugar ang mga biktima apan patay diha diha ang drayber sa traysikol ug bugtong ang pasahero lang ang nadala sa Verallo District Hospital human makaangkon og mga samad sa nawong ug bun-og sa kalawasan apan gibalhin usab dayon kini sa tambalanan dinhi sa dakbayan sa Sugbo.

Hinuon ang drayber sa Ceres bus boluntaryo nga mitahan sa iyang kaugalingon sa kapolisan ug nabalhog na karon sa detention cell samtang nagpaabot sa tukmang kaso nga ipasaka batok niya. - Darrel A. Carumba (BANAT NEWS)