Polis nga may mansion sutaon sa PDEA

CEBU, Philippines – Milihok karon ang Philippine Drug Enforcement Agency (PDEA) aron pagsuta sa taho nga may Sugbuanong polis nga nahimong negosyante og ginadiling drugas ug nanag-iya og mansion sa Talitay, Maguindanao.

Matud pa ni Undersecretary Paul Clarence Oaminal sa Dangerous Drugs Board (DDB) nga nakigdugtong na ang mga otoridad sa PDEA karon sa mga kapolisan sa Maguindanao aron sutaon kining maong report.

Kini may labot sa gipalakaw nga estorya ni Ameril Umbra Kato, usa ka opisyal sa Moro Islamic Liberation Front (MILF) nga nagtumbok sa usa ka polis nga taga Cebu kansang mansion nagkantidad kuno og P10 milyones didto sa Talitay.

Si Kato nga “giwanted ” na karon sa mga otoridad sa kagamhanan gumikan sa nagpatongpatong nga kiha nga gisang-at batok kaniya gumikan sa nagkadaiyang krimen   nga iyang nahimo didto sa Mindanao, mikutlo sa pamahayag sa information committee chairman sa MILF Khaled Musa kinsa mao gyu’y giingong nasuhito sa polis nga Sugbuanon kinsa nadato kuno gumikan sa kakusog sa negosyo niining illegal nga drugas.

Matud pa ni Oaminal nga bisan kontra sa gobiyerno kining tinubdan sa maong taho, katungod sa PDEA nga kuykoyon ang kamatuoran.

Kini tungod kay nagtuo si Oaminal nga may posibilidad nga tinuod kining balitaa. Gani gisaway niya ang kadagkoan sa kapolisan sa rehiyon 7 gumikan sa kaarisgado niini sa pagpanghimakak sa maong pasangil, sa walay pagsusi basin kun matinuod nga may polis nga Sugbuanon nga miburot sa kadato na gumikan sa pamatigayon sa ilegal nga drugas.

Si Oaminal miingon nga ilang gikontak karon ang mga tinugyanan sa National Intelligence Coordinating Agency (NICA) aron patabangon og paniid sa mga polis dinhi sa Sugbo ug sa Maguindanao, nga nanag-iya sa maong mansion didto sa maong lalawigan.

Miingon si Oaminal nga ilang sayron kun aktibo ba kini o retirado na sa serbisyo, diin kun matinuod man, ang bug-at nga silot maoy ipahamtang batok niining polisa, matud sa Usec sa DDB.

Gisusi usab nila karon ang titulo sa yuta nga gitarokan sa maong mansion ug ingon man ang tag-iya niining maong edipisyo aron masayran kun tinuod ba o dili ang report ssa MILF. – BANAT NEWS