Taxi driver gitulis, giluba

CEBU, Philippines – Kritikal ang kahimtang sa usa ka taxi driver human kini gitulis ug gidunggab sa tulo niya ka pasahero didto sa barangay Poblacion, dakbayan sa Lapulapu kagahapon sa kaadlawon.

Ang biktima mao si Edgar Amosco, 37, minyo ug residente sa Basak,   Lapulapu ug drayber sa Peace taxi nga adunay plakang GBM 495.

Base sa imbestigasyon ni PO1 Marlon Renehane sa Lapulapu Police Office nasayran nga gikan sa Pusok misakay ang tulo ka tawo usa niini tomboy ug nagpahatod sa   Poblacion sa maong dakbayan.

Sa dihang miabot kini sa usa ka dapit nga ngitngit ang palibot kalit nga gitionan sa ice pick ang   biktima ug mideklarar nga tulis ang iyang mga pasahero.

Gumikan kay ice pick lamang ang armas sa mga tulisan misukol si Amosco sa mga tulisan hinungdan nga wala kini molampos sa pagtulis kaniya. Apan ubay-ubay nga samad dinunggaban ang nahiaguman ni Amosco sa iyang kalawasan ug gidala kini sa Lapulapu District Hospital ug ubos pa kini sa obserbasyon sa mga mananambal. - Bong Soriano (BANAT NEWS)