Kapitolyo may 21 ka sakyanan

CEBU, Philippines – Mga bag-o na ang mga sakyanan sa tanang hepe sa matag departamento sa Kapitolyo human blesingi   ang 21 ka mga bag-ong sakyanan nga gipalit sa Kapitolyo alang sa maong mga opisyal.

Si Governor Gwen Garcia ug si Vice Governor Gregorio Sanchez ug mga kaubanang mga opisyal ug tanang mga department heads kinsa mitambong sa pagblesing ni Fr. Dan Delos Angeles sa 21 ka mga Kia Van ug Kia Pick Up masaligon nga magamit sa maayong pangalagad ang maong mga sakyanan.

Gibutyag ni Governor Garcia nga ang maong mga sakyanan maoy gihulip sa karaan nang mga sakyanan sa mga department heads alang sa mas epektibong serbisyo nila ngadto sa kalungsoran.

Gitataw sa gobernador nga mokabat sa P17 milyones kapin ang nabayran sa Kapitolyo sa 21 ka mga sakyanan ug nakadaginot kini og balig P5 milyones.

Kini tungod kay imbis tag P1 milyon ang Kia Pick Up, nahimo nalang kining tag P779 mil matag usa, samtang ang Kia vans nga tag P900 mil, matag usa, nahimo nalang kining tag P600 mil ang usa kay dinaghan man ang pagpamalit sa kagamhanan.

Human blesingi, gitestingan ug gidrayban dayon sa gobernadora ang usa sa maong mga sakyanan.

Midugang ang gobernador nga ang mga karaan nga sakyanan ipagamit gihapon sa ubang mga opisyal ug kawani sa Kapitolyo. – BANAT NEWS