Banko Sentral ng Pilipinas moprotiher sa mamirenda

CEBU, Philippines – Gisuportahan sa mga sakop sa hunta probinsiyal ang lakang sa Banko Sentral ng Pilipinas (BSP) sa naghigpit sa ilang mga balaod alang sa mga pawnshops.

Kini aron mapalambo ang proteksyon ngadto sa mga konsumedor ug aron labing mosalig ang mga mamirenda ngadto sa industriya sa prendahanan.

Sigun pa ni Provincial Board member Victor Maambong nga sa pagkakaron nagkadaghan na ang mga pawnshop o prendahanan sa tibuok nasud  nga nanghatag og mga alternatibo nga tinubdan sa pautang alang sa bagang duot sa katawhan.

Kini ang hinungdan nga ang Banko Sentral ng Pilipinas (BSP) miluwat og bag-ong panukdanan nga molantaw sa tanang mga pawnshop nga gipadagan sa tibuok nasud.

Nunot niini si Maambong miingon nga gikinahanglang magmintinar og minimum nga kantidad nga puhonan ang mga pawnshop aron pagsiguro nga dili maapiki sa ilang pagpadagan sa negosyo.

Naklaro ni Maambong nga ang lakang sa (BSP) alang gyud sa kaayohan sa publiko nga mamirenda. - Genevieve F. Dolino (BANAT NEWS)