Nagpusil sa dughan

CEBU, Philippines – Talandugon ang kahimtang sa usa ka tinun-an sa kolehiyo human giingong nag-unay og pusil sa iyang kaugalingon tungod sa problema sulod sa pinuy-anan niini sa sitio San Roque , Poblacion lungsod sa Alegria niadtong Domingo sa alas 10:10 sa gabii. Ang nagpusil mao si Reil Anthony Sabinay, 18. Matud pa ni PO2 Ronald Caño sa Alegria police dihang nahinabi sa Banat News nag-inusara ra sa balay niadtong higayuna si Sabinay ug nadunggan nalang ang usa ka sipang buto sa armas sa ilang balay. Dihang gisusi, nagkadugo na kini nga nagbuy-od ug may samad pinusilan sa dughan nga milapos sa bukobuko.Si Sabinay gikatahong migamit og .38 revolver pagpusil sa iyang kaugalingon ug daling gihatod sa Reinhard Wertgen Memorial Hospital sa maong lungsod apan gibalhin sa South General Hospital sa Naga. Giingong magul-anon na kini sukad nga namatay ang ilang inahan. - Darrel Carumba (BANAT NEWS)