Aksidente lima naangol

CEBU, Philippines – Lima ka mga tawo ang naangol sa pagbangga sa gisakyang pasaheroan sa railings ug poste sa suga taliwala sa karsada didto sa Poblacion Oriental sa lungsod sa Consolacion niadtong Domingo sa alas 6:30 sa buntag. Ang mga naangol mao ang magtiayong sila si Maria Conception Setenta, 27 ug banang si Joel Setenta, 28, lakip na ilang anak lalaki nga usa ka tuig kapin nga si Arjee; Maryjean Ababon,15, ug drayber nga si Wenifredo Velasco, 32. Matud pa ni PO1 George Banatasa sa Consolacion police dihang nahinabi sa Banat News, gikan sa siyudad sa Mandaue ang maong pasaheroan paingon sa Consolacion. Pag-abot sa nahisgutang lugar gibanggaan ni Velasco ang railings hinungdan nga nawad-an kini og kontrol ug nalahos sa poste. Nakaangkon og ginagmay’ng pangos ang mga pasahero ug drayber ug nadala sa Vicente Sotto Memorial Medical Center (VSMMC).Ang drayber mitug-an nga kalit natangtang ang propeller sa iyang sakyanan ug nawad-an sad og brake hinungdan nga iyaha nalang kining gibangga sa railings tunga sa karsada. - Darrel Carumba (BANAT NEWS)