Miresponding polis nakaangol sa silingan

CEBU, Philippines – Usa ka sakop sa Cebu City Police Office nga nadestino sa Parian Police Station ang gibalhog sa Fuente Police Station human gireklamong nakaangol sa iyang silingan atol sa pagresponde sa kaguliyang niadtong Domingo sa gabii diha sa sitio Mahayahay barangay Capitol Site ning dakbayan.

Si PO3 Buenaventura Ursaiz Jr.gipasanginlang nakaigo og splinter sa iyang armas sa walang tuhod ni Arnil Conson, 21, usa ka kitchen assistant sa usa ka dakong hotel sa uptown area ning dakbayan.

Si PO3 Ursaiz boluntaryong mitahan sa Fuente Police Station human masayod nga dunay nasamdan sa iyang pagpasalba gamit ang iyang service firearm caliber .40 pistol.

Sumala pa niini ngadto sa mga tigbalita nga iyang gibadlong ang mga silingang nag-away niadtong higayuna gumikan sa kasaba ug dihang nipasalba siya sa iyang armas sa yuta naigo kini sa semento ug ang pinisik nakaigo sa biktima.

Gidala sa Cebu City Medical Center (CCMC) si Conson apan gipagawas dayon gumikan kay garas ra ang igo niini.

Matud pang Ursaiz lehitimo ang iyang pagresponde tungod kay dunay nagkagubot sa iyang kasilinganan, andam usab siyang moatubang sa kaso kung gustuhon sa biktima.

Ang biktimang si Conson mipadayag nga aksidente gyud ang hitabo ug wala tuyoa ni PO3 Ursaiz.

Gibutyag niini nga sila maoy unang nagkaaway sa iyang papa nga si Rosendo dihang nasuko ang iyang amahan nga iyang gibadlong paghunong na sa pag-inom.

Si Chief Insp. Arnel Banzon ang hepe sa Fuente Police Station nagkanayon nga kun dili gyud ma-settle ila gyud ipasaka ang kasong reckless imprudence resulting physical injury.

Samtang ang hepe sa kapulisan sa dakbayan sa Sugbu Sr. Supt. Patrocinio Comendador mibutyag nga anaa sa Internal Affairs Service (IAS) ang pag-imbestigar kang PO3 Ursaiz kun duna ba kini kalapasan.

Apan sa iyang panglantaw lehitimo ang aksyon ni PO3 Ursaiz pagresponde sa usa ka trouble alarm sa iyang mga silingan. - Guam Logroño (BANAT NEWS)