CEBU, Philippines - Namatay ang usa ka wala hiilhing lalaki human mapantok ang ulo sa sementadong bahin sa Cabahug Wharf sa barangay Looc, dakbayan sa Mandaue alas 10:00 pasado ang takna kagahapon sa buntag.
Si PO2 Roy Andrin sa homicide section sa Mandaue City Police Office (MCPO) mibutyag sa Banat News nga nag-inusara nga naligo sa dagat ang biktima sa maong dapit.
Si James Baylosis, 40, ug Cristine Laroga, 24, nga taga Cabahug Wharf miingon nga nakita nila ang biktima nga naglangoylangoy sa dagat apan sa paghaw-as niya ngadto sa pantalan, nadakinas kini sa hagdan hinungdan sa pagkalamba sa iyang ulo sa sementadong baldosa.
Ang pagkapantok sa iyang ulo maoy iyang namatyan ug gani wala na kini kinabuhi sa pag-abot sa mga tinugyanan sa Emergency Rescue Unit Foundation (ERUF).
Gipaabot pa sa kapolisan ang mga kabanay sa biktima nga mokuha sa iyang patay'ng lawas gikan sa Rolling Hills sa dalan A.S. Fortuna sa Banilad sa maong dakbayan diin nila kini ihatod. – BANAT NEWS