Gipusil sa silingan namatay

CEBU, Philippines -  Gumikan sa personal nga bangi, namatay diha- diha ang usa ka 21-anyos nga lalaki human kini pusila sa iyang silingan didto sa barangay Nug-as, lungsod sa Alcoy niadtong Sabado sa buntag.

Ang biktima mao si Edris Mijares, 21, ulitawo, walay trabaho, nga taga Sitio Managing barangay Nug-as sa maong lungsod.

Samtang ang suspek mao si Arnulfo Adlao Bernaldo, 33 , minyo, mag-uuma nga silingan ra sa biktima.

Si SPO1 Primitivo Carunggay nga maoy hepe sa Alcoy Police Station mibutyag sa Banat News nga ang biktima naglingkod lang sa lantay sulod sa merkado dihang kalit nga miduol ang suspek ug sa walay igong hinungdan gipusil sa duha ka higayon.

Ang biktima nga naigo sa walang dughan ug sa walang bukton nakadagan pa og 40 metros unya sa pagkahagba niini diretso na og kamatay.

Kagahapon pa sa ala-1:00 sa kaadlawon boluntaryong mitahan ang suspek ngadto sa kapolisan sa lungsod kinsa mibalhog dayon kaniya sa prisohan. – BANAT NEWS