Pag-isyu'g prangkisa sa Banilad-Mandaue gikwestyon

CEBU, Philippines -  Wala makauyon ang Cebu City Traffic Operations and Management (Citom) sa gihimong lakang sa Land Transportation Franchising and Regulatory Board (LTFRB-7) tungod sa paghatag niini og prangkisa ngadto sa pipila ka publikong mga sakyanan alang sa Mandaue-Banilad (Country Mall) nga rota.

Matud pa ni Citom executive director Arnel Tancinco nga walay endorsement gikan sa kagamhanan sa dakbayan ang paghatag sa LTFRB-7 og bag-ong franchise.

“Kay dili man ma-deny nga prior to an approval of a franchise there is a need for an endorsement by the concerned Local Government Unit (LGU),” sumala ni Tancinco.

“So, napugos mi og hangyo sa konseho asking LTFRB nga dili mo-approve og franchise without the endorsement of the LGU through the Travel Line Committee,” dugang ni Tancinco.

Nasayran hinuon sa Banat News nga dunay napalabang nga resolusyon ang konseho sa dakbayan sa Mandaue nga naghangyo sa siyudad sa Sugbu nga tugutang makasulod diha sa Banilad ang hingtungdang publiko nga mga sakyanan.

Apan matud ni Tancinco nga si Konsehal Sylvan “Jack” Jakosalem kinsa sakop usab sa Citom board hugtanong nihimakak nga nakadawat og kopya ang konseho sa siyudad sa Sugbu labot sa nahisgutang resolusyon.

Matud pa ni Tancinco nga sila nasayod lang sa maong resolusyon dihang gisukip sa suwat-pahibawo sa LTFRB-7 nga kini dunay bag-ong giaprubahan nga prangkisa. – BANAT NEWS