3 ka bata naanod; 1 patay 2, missing

CEBU, Philippines -  Patay nang nakit-an ang usa ka 7-anyos nga batang babaye ug pabilin pang missing ang laing duha ka mga batang kauban niini nga gituuhang nalumos human maanod sa baha samtang padulong manginhas sa dagat sa barangay Palanas lungsod sa Alcantara niadtong Sabado sa alas 4:30 sa hapon.

Ang nakit-ang patay na mao si Willie Clare Tejas, 7-anyos, samtang gipangita pa ang iyang mga kaubang sila si Jonna Mae Garao, 9, ug Virgil Yusores, 8, pulos molupyo sa barangay Lawaaan sakop sa maong lungsod.

Subay sa imbestigasyon ni PO2 Nestor Tonilong sa Alcantara Police ang mga bata mibiya sa ilang tagsa-tagsa ka balay alas 3:00 sa hapon niadtong Sabado aron manginhas sa dagat.

Ang mga bata gikatahong anha miagi sa luyo sa gymnasium sa barangay Palanas kansang luyo dunay sapa nga patabok ngadto sa barangay Palanas diin unta manginhas ang mga bata.

Kini bisan pa man sa ka-sulog sa tubig mipadayon gihapon ang mga bata pagtabok sa suba aron manginhas apan samtang milabang si Tejas   gianod kini padulong sa dagat.

Ang mga kaubanan niini gikatahong misuway unta pagtabang apan dihang mitaak sila sa tubig sila na usab ang gianod paingon sa dagat.

Tungod sa kakusog sa bul-og sa tubig pagawas sa bukana walay nahimo ang mga biktima nga makapadaplin hinungdan nga pulos gyud sila gianod paingon sa lawod.

Daling gipahigayon ang search and rescue operation ug pagka alas 5:30 sa hapon ug human sa usa ka oras na-recover si Tejas nga wala nay panimuot sa dagat apan dihang gihiling ni Dra. Norita Lagada ang municipal health officer sa lungsod patay na diay kini.

Samtang sa paghimo ning balita padayun pang gipangita ang duha ka laing mga bata nga pabilin pang missing.

Si PO3 Ludiveco Odiver sa Alcantara police station sa pakighinabi sa Banat News nagkanayon nga walay uwan nga nahitabo atol sa pagkahitabo apan gihulagway niining kusog gyud ang sulog sa maong suba panahon sa hunas.

Sumala pa ni Odiver nga dunay mga tawong nakakita sa mga bata nga miagi sa luyo sa gymnasium apan wala sila magdahum nga manglabang ang mga bata sa suba.

Dugang pa niya nga sa milabay'ng tuig duna na say naanod nga bata diha sa maong dapit. – BANAT NEWS