Kasong murder gipasaka batok sa magsuon

CEBU, Philippines – Pormal nang gipasaka ngadto sa korte ang kasong murder batok sa duha ka mga managsuon kinsa mipatay sa ilang silingan tungod lamang sa kahubog.

Ang gipasakaan og kaso mao sila si Rolando Yangyang alyas Dodong ug Rommel Yangyang alyas Pangkoy, pulos hingkod nga nagpuyo sa barangay Dumlog, Talisay city.

Nasayran nga niadtong Agusto 30, 2008 mga alas 7:30 ang takna sa gabii ang duha ka suspetsado kalit lamang nga misulod sa balay sa biktima nga si Edmundo Palanas Lumagsao, hingkod, nga silingan ra sa mga suspetsado.

Sigun pa sa apidabit ni Flora Lumagsao, asawa sa biktima  nga ang duha ka managsuon mikulata sa iyang bana sa walay igong hinungdan gikan sa sulod sa ilang balay.

Dihang misiyagit og panabang sa ilang kasilinganan, si Romel mikuha og kutsilyo ug gidunggab sa tiyan ang biktima.

Matud pa sa asawa nga gikoptan unta sa iyang bana ang kutsilyo aron maibot, apan giduso na hinuon kini sa laing suspetsado nga si Rolando hinungdan sa kadako sa samad sa tiyan sa biktima.

Gidali sa pagdala sa asawa ug mga silingan ang biktima sa Talisay District Hospital ug gibalhin sa Vicente Sotto Memorial Medical Center apan pipila ka oras namatay ang biktima.

Si Talisay City assistant Prosecutor William Canta ug City Prosecutor Marcial Rubia miduso na sa maong kaso ngadto sa korte tungod sa kapakyas sa mga suspetsado sa pagtubag sa maong asunto. - Chester Abadilla (BANAT NEWS)