Gullas, 3 ka mayor wa kawad-i'g paglaum

CEBU, Philippines – Bisan pa sa pagbasura sa Korte Suprema sa mga motion for reconsideration nga giduso sa 16 ka dakbayan kabahin sa pagbalik kanila ngadto sa pagkalungsod, si Kongresista Eduardo Gullas ug ang mga mayor sa duha ka apektadong siyudad dili pa moisa sa puting bandila.

Si Gullas sa milabay’ng adlaw nagkanayon nga duna sila’y mga lig-ong puntos nga angayan ilantugi sa ilang pleading sa sunod semana.

Matud pa ni Gullas, base sa Article 8 (Judicial Department) Section 4 (2) sa 1987 Constitution nga ang ulahing 6-6 votes sa Korte Suprema wala maka-constitute sa mayoriya sa voting members.

Ang maong article sa 1987 Constitution nagkanayon “all cases involving the constitutionality of a treaty, international or executive agreement, or law, which shall be heard by the Supreme Court en banc, and all other cases which under the Rules of Court are required to be heard en banc, including those involving the constitutionality, application, or operation of presidential decrees, proclamations, orders, instructions, ordinances, and other regulations, shall be decided with the concurrence of a majority of the members who actually took part in the deliberations on the issues in the case and voted thereon.”

Si Gullas nagkanayon nga ang pag-constitute sa mayorya sa botos kinahanglan nga 7-6 kay kung dili, ang desisyon dili pa mahimong pinal.

Ang Korte Suprema ning bag-uhay lang mipagawas og desisyon nga nagbasura sa motion sa 16 ka lungsod lakip na niini ang Bogo, Naga ug Carcar ug mipahibalong pinal na kini ug wala nay dawatong ‘pleading’ kalabot sa maong isyu.

Si Gullas miingon nga ‘third motion for reconsideration” nga ilang iduso ilahang tawgong “something else” pinaagi sa ilang abogadong si Estelito Mendoza.

Apan si kanhi Cebu governor ug karon 2nd District Rep. Pablo Garcia sa iyang habig nagkanayon nga hanap na ang kahigayunan nga mabali pa ang desisyon sa Korte Suprema.

 Sumala pa niini tangason na kaayong paminawon pa sa Korte Suprema ang ikatulong motion for reconsideration tungod kay final and executory na ang desisyon bahin niini ug walay laing pleading nga dawaton. Gitataw hinuon sa kanhi gobernador kinsa usa ka constitutionalist, dunay mga higayon nga usbon sa mga hurado sa Korte Suprema ang nahauna na nilang desisyon.

Mimaymay hinuon si Garcia sa tulo ka mayor nga dili mabalaka sa higayon nga mapakyas ang ilang mosyon sanglit motabang ang Probinsya ug ang national government kanila. - Brenda Batuto uban sa report ni Chester Abadilla (BANAT NEWS)