CEBU, Philippines – Arestado ang usa ka gidudahang drug pusher human sa gihimong ronda sa kapolisan diha sa iyang panimalay nga miresulta sa pagkakumpiskar sa pinaketeng gidudahang shabu ug armas diha sa dalan Magsaysay sa barangay Pasil ning dakbayan.
Ang gidakop giilang si Ronald Blanza alyas Kogtong pinasikad sa search warrant nga giisyu ni Judge Silvestre Maamo,Jr. sa RTC branch 17 nga pinetsahan og Mayo 8.
Ang grupo sa San Nicolas Police Station pinanguluhan ni Sr. Insp. Renerio Agustin, mipahigayon sa ronda inubanan ni barangay kagawad Raulito delos Reyes ug duha ka mga tanod.
Nakuha sa kapolisan diha sa panimalay sa suspek ang 23 ka paketeng may sulod nga gidudahang shabu, digital nga timbangan ug uban pang gamit pag-repacking sa maong illegal nga drugas. Nakuha usab ang usa ka .38 kalibreng armas ug usa ka .22 CO2 nga airgun diha sulod sa balay ni Blanza. - Edwin Ian Melecio (BANAT NEWS)