CEBU, Philippines – Usa ang patay ug tulo ang naangol sa panagbangga sa duha ka motorsiklo sa highway sa Poblacion atbang sa eskuwelahan sa siyudad sa Danao niadtong Biyernes sa alas 11:30 sa gabii.
Dead on arrival sa Danao District Hospital ang drayber sa Kawasaki nga motorsiklong si Ryan Jaime Gonzales, 18, taga sitio Langlang barangay Cogon siyudad sa Danao.
Samtang ang mga naangol mao ang magtiayon nga si Jaime Manit Moneva ug asawang si Ligaya Caliza Moneva ug ilang anak nga lalaking luwan sa Kawasaki nga motorsiklo ug taga barangay Suba sa dakbayan sa Danao.
Matud pa ni PO3 Dominique Tampus sa Danao City police dihang nahinabi sa Banat News si Gonzales nagsunod sa motorsiklo nga gisakyan sa pamilyang Moneva paingon sa habagatang bahin nga direksiyon.
Apan pag-abot nila sa nahisgutang lugar kalit lang nadumbolan ni Gonzales ang motorsiklo sa mga Moneva hinungdan nga nawad-an kini og kontrol ug midasmag sa punoan sa dakung kahoy daplin sa karsada ug nalabay nga nag-una ang ulo sa kongkretong kalsada.
Samtang ang magtiayong Moneva nalamba sab ug nadakdak sa karsada hinungdan sa naangkong mga bun-og ug pangos sa kalawasan ug gidali pagdala ang mga biktima sa Danao District Hospital.
Apan tungod sa seryosong kadaut sa ulo ni Gonzales nga nadakdak sa semento wala na kini makasugakod pa ug namatay gyud paghiabot sa tambalanan. - Darrel Carumba (BANAT NEWS)