Gipusil sa bayaw namatay

CEBU, Philippines – Gumikan sa pasiaw usa ka lalaki ang gipatay human kini pusila sa iyang bayaw sa sitio Kasanta barangay Mactan dakbayan sa Lapulapu kagahapon sa kaadlawon.

Ang biktima mao si Teodocio Esparcia, 34, residente sa maong dapit samtang ang mipusil kaniya mao ra usab ang iyang bayaw nga si Bobby Pejana, 36.

Sa pamahayag ni Pejana sa Banat News, nagbilar sila sa namatay nilang silingan kauban si Esparcia nianang tungura. Giingong nagbuwag sila og lamesa samtang nagduwa og tong-its.

Atol sa ilang duwa nagbinayloay sila og mga pasi-aw hangtod sa misantop kini sa paghinagitay ug gani miabot kini sa punto nga silang duha nagkarambola.

Gumikan sa pagbadlong sa ilang mga paryente nahunong makadiyot ang maong away samtang si Pejana miuli sa ilang panimalay ug mikuha sa iyang kalibre 38.

Si Esparcia nga padung na unta mopauli gisundan ni Pejana ug kalit kining gipusil sa walang dughan ug kamot hinungdan sa kamatayon niini.

Si Pejana daling mipahilayo sa maong dapit ug wala na kini maabti sa mga awtoridad apan pipila ka oras ang milabay mitahan kini sa kanhi kagawad sa barangay Mactan nga si Thata Dehayco ug gidala usab kini sa buhatan sa kapolisan. - Bong Soriano (BANAT NEWS)