Tulisan nga mag-taxi nadakpan

CEBU, Philippines – Natanggong sa prisohan sa Pari-an Police Station ang duha ka gipasanginlang tulisan, usa kanila taxi driver nga mitulis sa duha ka babayeng pasahero sa jeepney kagahapon sa alas dos sa kaadlawon.

Ang mga biktima giilang sila si Juvilyn Batusan, 28 , taga Tugas, Pardo ug Brenda Miñoza, 23, taga Purok 8, Camputhaw samtang ang mitulis kanila giilang sila si Ryan Carseran, 19, taga Guizo, Tipolo dakbayan sa Mandaue ug taxi driver nga si Gerondio Lanticsi.

Sa imbestigasyon nga gipahigayon ni SPO2 Rodrigo Mangubat nagsakay ang duha ka biktima sa 17B nga jeepney padulong sa dalan Colon ug pag-abot sa eskina Osmeña Blvd. ug P. del Rosario misakay si Carseran ug mideklarar og tulis dungan sa pagtion kanila og kutsilyo.

Ang suspek mikuha sa cell phone ni Batusan, cell phone ug white gold nga kwentas usab ni Miñoza ug nagdali og kanaog ug misakay sa nagsunod nga taxi unit nga gimaneho ni Lanticsi.

Ang mga biktima nagpakitabang sa nagpatrolyang tanod nga si Hermogenes Borres sa barangay Kamagayan ug gikuyugan sila sa sudlonong bahin sa Kamagayan diin nila maabti ang duha sa ‘hawsyaw’ nga prendahanan.

Ang duha gidakop ug narekober ang mga butang sa duha. Sa pagkighinabi sa Banat News sa mga suspetsado, miangkon si Carseran nga   siya ang mitulis sa mga biktima    apan iyang gihimakak nga siya nanion. Miangkon sad siyang iyahang kakunsabo si Lanticsi bisan paman sa panghimakak sa naulahi kinsa miinsister nga igo ra siyang gisakyan sa suspek. - Lovers Lyn Yangyang (BANAT NEWS)