CEBU, Philippines – Mokapin sa 470 ka mga stalls gikan sa napulo ka mga satellite markets sa siyudad ang gideklarar na nga bakante sa Cebu City Market Authority.
Kini tungod kay ang mga nag-abang niini napakyas pag-renew sa ilang mga contract of lease sulod sa gihatag nga tagal sumala pa ni City Market Administrator Racquel Bohol-Arce. Kadaghanan niini anaa sa Unit 1 sa Carbon Public Market.
Subay niini, miingon si Arce nga gikatakda nang padalhan og notice to vacate karong Lunes sunod semana ang apektadong mga stallholders apan hatagan sila og pito ka adlaw aron boluntaryong mopahawa sa ilang mga pwesto.
Apan gitataw ni Arce mahimo gihapong maka-renew sa kontrata ang mga stallholders samtang itakda pa ang bidding nga gipaabot nga mahitabo karong sunod buwan ngadto sa laing mga interesado niini.
Midugang si Arce nga lakip unya sa ipaubos sa bidding mao ang laing 406 ka mga stalls nga nagpabiling bakante hangtud karon.
Sa pikas bahin, gibutyag ni Arce nga misaka ang koleksyon sa kamerkaduhan sa dakbayan sulod sa unang tulo ka buwan niining tuiga tungod kay nakakolekta sila og P11.3 milyones sa 1st quarter nga mas taas kun itandi sa kapin sa P9.7 milyones sa susamang period sa miaging tuig. – BANAT NEWS