Estatuwa ni Pacman gisupak

CEBU, Philippines – Dili pabor si acting Mayor Michael Rama nga tukoran og estatuwa si Manny “Pacman” Pacquiao dinhi sa dakbayan.

Ang konseho sa siyudad pinaagi sa gipadangat nga mosyon ni Konsehal Rodrigo Abellanosa niaprubar nga himoan og statue ang people’s champ.

Kini tungod usab sa dakong dungog nga nahatag ni Pacman sa nasud lakip na sa Sugbo sa natad sa boxing sa nagkalain-laing weight division.

Labing bag-o niini mao ang paglangkat sa IBO light-welterweight belt human palukapaha sulod sa tulo ka higayon si Ricky “Hitman” Hatton.

Apan matud ni Rama nga dili tukma ang pagbutang og estatuwa sa usa ka tawo nga buhi pa ug anaa pa sa tunga-tungang bahin sa iyang kabantog.

“I don’t think it would be advisable nga i-encourage ang tawo nga butangan nimo og statue nga buhi pa, kay ang ending diha, in memory of” sumala ni Rama.

 “I don’t think also nga mo-feel si Manny og comfort nga butangan nato siya dinhi og rebolto,” dugang pasabot sa acting mayor.

Alang kang Rama nga mas nindot paminawon nga ikonsiderar si Pacquiao nga living legend kay sa himoan niining higayona og estatuwa.

Mas pabor ang acting mayor sa resulusyon nga naaprubahan sa City Council nga nagsugot kang Presidente Gloria Macapagal Arroyo nga hatagan si Pacman og award.

Ang gisugot sa konseho nga award nga ihatag sa gitawag usab og pambansang kamao mao ang Mega Tourism Award isip numero unong tourism promoter sa nasud.

Gani matud ni Rama nga iyang ideya ang pagsugyot ngadto sa nasudnong kagamhanan nga hatagan sa nahisgutang award si Pacman.

Pinaagi sa kainila sa people’s champ, giingong dili na kinahanglang mogasto pa og dakong kantidad ang Pilipinas sa pag-promote niini ngadto sa gawas sa nasud. -Elly Bolonos (BANAT NEWS)