CEBU, Philippines – Nagpaabot nalang si BID-7 Regional Director Casimiro Madarang III sa mando ni DOJ Sec. Raul Gonzales nga siya ipatawag ngadto sa iyang buhatan ug mag-atubangay sila ni Cebu City Assistant City Prosecutor Mary Ann Castro.
Matud pa ni Madarang nakadawat siya og memorandum gikan ni Gonzales nga kinahanglan si Madarang mosumiter sa iyang pinanumpaang reklamo batok ni Castro ngadto sa buhatan niini.
Dako ang pagtuo ni Madarang nga human madawat ni Gonzales ang iyang reklamo mopagawas na gyud kini og kamandoan nga paatubangon silang duha ni Castro sa buhatan ni Gonzales.
Mibahad si Madarang nga iyang iyagyag ang tanang mga kahiwian sa piskal diha sa BID-7.
Sa pagsuwat ning balita, si Castro atoa sa kaulohan sa buhatan ni Sec. Gonzales ug duha na ka adlaw wala na mopakita sa BID-7.
Giangkon ni Madarang nga wala pa siya’y nadawat nga kamandoan gikan sa DOJ nga si Castro gitaktak na sa buhatan sa BID-7 apan igo lamang gipasidan-an si Castro nga dili una modala sa mga transaksiyon sa BSI. - Bong Soriano (BANAT NEWS)