CEBU, Philippines – Usa ka “special child” ang napalgang patay sa Humabon Park dalan Mabini barangay San Roque pasado alas 7 kagahapon sa buntag.
Si Mario Villamero Baysa Jr., 29, lumad nga taga barangay Panadtaran lungsod sa San Fernando ang napalgang patay sa usa ka tindero nga si Joemar Engbino,18.
Sa pakisusi sa kapolisan nasayran nga ang biktima nakit-an nalang nga nagbuy-od sa dalan hinungdan nga mitawag kini sa Emergency Rescue Unit Foundation (ERUF).
Apan sa pakisusi sa biktima sa taga ERUF wala na kini kinabuhi hinungdan nga gidala nalang kini sa Saint Francis Funeral Homes alang sa autopsy nga ipahigayon.
Matud pa sa inahan sa biktima nga si Carmela Baysa nga ang iyang anak usa ka “Mongoloid” ug kalit lang kini nga nahanaw sa ilang panimalay niadto pang Lunes sa buntag.
Dugang pa ni Baysa nga ang iyang anak usa ka insulin dependent isip tambal sa iyang sakit nga diabetes.
Matud pa ni SPO3 Rey Cuyos sa Cebu City Police Office Homicide Section sa pakighinabi sa Banat News nga ila pang gipaabot ang resulta sa ipahigayon nga autopsy sa patay’ng lawas sa biktima aron masayran kun kini gipatay o namatay lang tungod sa sakit. - Lesley Caminade (BANAT NEWS)