RMG-7 sa Sulu di pa pabalikon

CEBU, Philippines – Dili pa makauli dinhi sa Sugbu ang 81 ka mga sakop sa Regional Mobile Group (RMG-7) nga gipadala sa Mindanao pagtabang sa militar sa paggukod sa mga bandidong Abu Sayyaf nga midagit sa usa ka sakop sa International Committee of the Red Cross (ICRC) nga si Eugenio Vagni.

Kini maoy gipahibalo ni PNP chief Jesus Versosa atol na sa iyang pagduaw dinhi sa Sugbu kagahapong adlawa dihang nitambong kini sa pagsubo sa building sa Regional Special Training Units (RSTU) diha sa lungsod sa Sibonga.

Matud pa ni Versosa nga wala pay ensaktong petsa kun kanus-a niya papaulion ang mga sakop sa RMG-7 nga iyang gipadala niadtong Abril 10, didto sa Zamboanga ug karon tua na sa Jolo, Sulu.

Sumala pa niini, anha na paglurang sa kagubot ug kun maluwas na si Vagni gikan sa ASG una pa pabalikon dinhi ang tropa.

Samtang giklaro usab niini nga sa pagkakaron wala pa usab siya’y planong dugangan sa PNP ang pagpadala’g tropa sa Mindanao samtang nagpadayon pa ang operasyon sa nahisgutang lugar. - Guam Logroño (BANAT NEWS)