Nat'l Day of Celebration madayon gihapon

CEBU, Philippines – Moduyog ang kagamhanan sa dakbayan sa Sugbo sa pagsaulog sa National Day of Celebration ugmang adlawa subay usab sa kadaogan ni Manny “Pacman” Pacquiao sa iyang pagpakigsangka kang Ricky “Hitman” Hatton niadtong miaging Domingo.

Gilangkat ni Pacman ang IBO light-welterweight belt nga gihuptan ni Hatton human palukapaha niini ang Briton makatulo ka higayon.

Matud ni acting Mayor Michael Rama nga angayan lang nga magsadya ang tanang Pilipino sa gihatag nga dungog ni Pacquiao sa nasod.

Una nang gideklarar ni Presidente Gloria Macapagal Arroyo ang Mayo 8 isip National Day of Celebration pinaagi sa Presidential Proclamation Number 1764.

Nagkanayon si Rama nga suportahan sa dakbayan ang deklarasyon sa presidente tungod usab sa talagsaong katakus nga gipakita ni Pacman.

“If it’s a national thrust then we should support because we have proven to the whole world that it takes a Filipino to become the greatest fighter who ever live,” sumala ni Rama.

Wala pa hinuon matino kun unsa ang himuon nga mga kalihukan sa city government atol sa nasudnong kasaulugan ugmang adlawa.

Apan gitahasan na ni Rama si Konsehal Raul Alcoseba nga maoy makig-alayon sa Team Pacquiao alang sa paghatag sa siyudad og linain nga victory party niini.

Ang konsehal nga maoy vice chairman sa committee on sports sa City Council niangkon hinuon nga wala pa makahinabi ang kampo ni Pacman.

Midason hinuon si Alcoseba sa pamahayag ni Rama nga angayan lang hatagan og deserving welcome ang gitawag usab og pambansang kamao.

“Tagaan gyud nato kay kadtong gihimo ni Manny para man gyud to sa tanang Pilipino, so, makatarunganon lang nga hatagan nato siya og honor,” matud ni Alcoseba. - Elly Bolonos (BANAT NEWS)