Odilao mo-resign isip tsirman sa C-FARMC

CEBU, Philippines – Ang tsirman sa Talisay City Fisheries Aquatic Resource Management (C-FARMC) nga si David “Boy” Odilao Jr. mibahad nga mo-resign sa iyang katungdanan kung ang kagamhanan sa dakbayan sa Talisay dili modakop sa mga commercial fishing boats nga maoy mihurot sa mga isda sa kadagatan sa maong dakbayan.

Matud pa ni Odilao ngadto sa mga tigbalita, nga nagkapuliki siya og panubag sa mga reklamo sa mga mananagat nga Talisaynon kinsa naapiktahan niining presensya sa mga de barkong panagatan sa ilang kadagatan.

Matud pa ni Odilao nga wala nay ikapamugas ang mga mananagat sa Talisay kay gihurot og sipong sa debarkong panagatan ang mga isda sa ilang lugar.

Midugang siya nga ang Fishermen Sea and Ecological Care (FISECA) nga maoy sea warden diha sa Talisay nagmika lang ug gipasagdan lang ang maong mga panagatan.

Matud ni Odilao nga migamit   og trawl ug uban pang klase sa ginadiling panagat ang maong mga de barkong panagatan.

Gumikan sa pagmika sa mga miyembro sa FISECA, mibahad si Odilao nga mas maayo pa’g mo-resign nalang siya sa iyang katungdanan.

Apan usa gyud sa nakapaisog kang Odilao sa pagbiya sa iyang katungdanan mao ang iyang bag-ong tahas nga pas-anon, isip chief of staff sa opisina ni Partylist Representative Pastor Jun Alcover sa Alliance for Nationalism and Democracy (ANAD).

Si Odilao kinsa maoy kauban ni Alcover sa partido, maoy piyalan sa mga gimbuhaton sa buhatan sa bag-ong kongresistang Sugboanon. - Brenda D. Batuto (BANAT NEWS)