P2 mil para seniors ihatag na

CEBU, Philippines –  Ihatag na sugod karong adlawa sa kagamhanan sa dakbayan sa Sugbu ang tag-P2 mil nga financial assistance ngadto sa mga senior citizen sa siyudad.

Kini maoy eksklusibong gipahibawo sa chairman sa Cebu City Senior Citizens’ Council nga si Konsehal Rodrigo   Abellanosa sa Banat News.

Ang pagpanghatag sa hinabang pinansyal sugdan karong alas 8 sa buntag diha sa Plaza Sugbu human usab sa hamubong programa nga ipahigayon.

Gitataw hinuon ni Abellanosa nga ang mga senior citizen lang sa 12 ka mga barangay sa siyudad maoy hatagan og prayoridad karong adlawa.

Kini naglakip sa Cogon-Ramos, Ermita, Kalubihan, Kamagayan, Pahina Central, Pahina San Nicolas, Parian, Pasil, San Antonio, San Nicolas Proper, Sawang Calero ug San Roque.

Giawhag ni Abellanosa ang mga senior citizen nga wala malakip sa schedule nga dili una motunga sa City Hall aron dili magpunsisok sa distribution center.

Moabot sa 25 mil ka mga senior citizen ang unang makapahimulos sa financial assistance nga ihatag sa kagamhanan sa dakbayan karong tuiga.

Ang labaw sa Cebu City Office of the Senior Citizens Affairs (OSCA), Guillermo Casinillo, mipahimangno sa mga senior citizen nga magdala lang sa ilang OSCA ID pagkuha sa assistance.

Samtang gipahibalo usab ni Casinillo nga magpadayon ang ilang buhatan pag-process niadtong mga senior citizen nga gustong mupahimulos sa hinabang pinansyal.

Gitataw hinuon sa labaw sa OSCA nga dili pa matino kung kini kanus-a mahatagan sa hinabang pinansyal tungod kay P50 milyones lang ang gigahin sa siyudad niining tuiga. - Elly Bolonos (BANAT NEWS)