Manghod gipusil sa maguwang

CEBU, Philippines – Gipriso dayon   ang usa ka 38 anyos nga mananagat nga miunay og pusil sa kaugalingon niyang manghod didto sa barangay Looc, lungsod sa San Remegio, niadtong Lunes sa ala 1:00 sa kaadlawon.

Ang suspek mao si Felix Bantoc, 38 , minyo, ug mananagat nga taga Looc , samtang ang biktima mao ang iyang manghod nga si Alberto Bantoc, hingkod, nga taga barangay Tacop, San Remegio.

Si PO1 Michael Anciano sa San Remegio Police Station mibutyag sa  Banat News nga gipriso nila ang suspek niadtong Domingo kay gikulata niini ang biktima.

Apan tungod kay wala man mokiha ang biktima gibuhian lang usab dayon nila ang suspek.

Apan nianang pagka Lunes sa kaadlawon gipusil na gyud sa suspek ang biktima ug ang bala sa armas nga gigamit, milapos gikan sa bukton hangtod ngadto sa hawak sa biktima.

Samtang gihatod sa tambalanan ang biktima gisikop usab dayon sa kapolisan ang suspek ug nagpahayahay kini karon sa prisohan sa San Remegio. - Darrel A. Carumba (BANAT NEWS)