Birhen sa Simala mobisita sa Talisay

CEBU, Philippines – Ang Imahen sa Birhen sa Lindogon, barangay Simala, lungsod sa Sibonga mobisita sa parokya ni San Isidro Labrador sa barangay San Isidro, dakbayan sa Talisay karong Mayo 8-10, 2009.

Si Padre Carlito Mier ang Kura Paruko sa San Isidro Parish mibutyag sa Banat News kagahapon nga tinguha sa milagrosong imahen ayuhon ang mga masakitong parokyano sa San Isidro.

Matud ni Padre Mier nga adunay mga nangandoy nga makakita ug makaduaw sa milagrosong imahen apan dili kini makahigayon og adto sa iyang shrine sa lungsod sa Simala.

Gilauman nga mga alas 10:00-11:00 sa buntag maabot ang nahisgutang imahen sa simbahan ni San Isidro .

Inigbiya niini sa Sibonga pahigayonan kini og departure mass aron labi siyang magamhanan inig-abot sa San Isidro.

Inig-abot usab niini sa San Isidro adunay ipahigayong welcome mass sa alas 12:00 sa udto ug sa alas 6:30 sa gabii ipahigayon ang novena alang kang San Isidro Labrador kinsa magsaulog sa iyang kapistahan sa unang semana sa Hunyo.

Sa ala 1:00 sa gabii sa mao usab nga adlaw ipahigayon ang healing mass kinsa ang magsaulog niini si Padre Luigi Maria Martinez.

Sa alas 11:00 sa buntag sa Mayo 10, 200 ipahigayon ang departure mass diin human sa maong misa ang imahen ang mobiya sa parokya ni San Isidro balik ngadto sa Lindogon.

Ang parokya ni San Isidro natukod niadtong Marso 10, 2005. - Brenda D. Batuto (BANAT NEWS)