Abusadong opisyal angay ikiha - DILG

CEBU, Philippines – Mahimong kapasakaan og kasong “abuse of authority” ang mga opisyal sa lokal nga kagamhanan nga magpatuman og balaod sa ilang lugar nga wala imando sa batakang balaod o kaha sa local government code (LGC).

Mao kini pintok nga gipasabot ni manlalaban Danilo Almendras, usa sa mga legal counsel sa Department of Interior and Local Government (DILG) 7 sa pakighinabi sa Banat News.

Ang maong pamahayag may labot sa giingon sa mga miyembro ug opisyal sa Iglesia ni Cristo (INC) sa giingong pagka-“bias” ni Mayor Deogenes Derama sa lungsod sa Boljoon, gumikan kay wala sila tugoti nga maka-abang sa sports complex sa maong lungsod sa miaging semana.

Matud pa ni Almendras nga walay balaod nga nagdili ni kinsa mang relihiyon sa paggamit sa mga kabtangan sa lungsod, busa ang paglapas niini dili lamang usa ka bias kundili usa ka pag-abusar sa katungod, matud pa niya.

Gipatin-aw ni Almendras nga ang gimando sa balaod mao nga kinahanglang ipagamit ni kinsa mang tawo o pundok ang mga kahimanan sa lungsod sama sa sports complex apan kinahanglang bugtian kini og kuwarta o abang ,aron nga makakuwarta ang lungsod yawat nalang mabawi-bawi ang gasto niini sa kagamhanan .

Apan gitino diha sa balaod nga kinahanglang may ordinansa ang   lokal government unit (LGU) bahin sa pagpaabang aron legal ang pagdawat niini og abang ingon man ang pagluwat og opisyal nga resibo ngadto sa mangabang aron masiguro nga mahiadto sa panudlanan sa gobyerno ang maong abang. Sa bahin sa giingong pagdumili ni Derama sa pagpagamit sa sports complex sa lungsod ngadto sa INC, si Almendras miingon nga nabalaka lang malagmit ang mayor basin may kagubot nga mahitabo sa ilang lungsod.

Apan nasayran sa Banat News gikan kang Stephen Villanueva, tigpamaba ni Derama nga wala pa sila makasuway sa mga INC nga nagrali sa ilang lungsod nga nagmugna og kagubot.

Midugang siya nga mas gipalabi nila ang mga disko ug uban pang kalingawan sa lungsod nga anha ipahigayon sa sports complex kay ganahan sila niini , itandi sa rali sa INC.

Lisod usab mahitabo ang kagubot tungod sa kaaktibo sa kapolisan sa lungsod sa pagbantay sa kahusay ug kalinaw sama sa mga rali nga gihimo sa mga Sabadista, Protestante, Born Again ug uban pang relihiyon diha sa maong lungsod, nga gibantayan pag-ayo sa mga otoridad ,matud pa ni PO3 Ernesto Villamor, sa pakighinabi sa Banat News.

Sa sayo pa si Rogelio Bragat usa sa mga miyembro sa INC mihingalan kang Derama nga mao ray nag-inusarang mayor sa nasud nga dili sibilisado ug susama sa mga lumad nga layo kaayo sa mga sibilisadong sosyidad tungod matud pa sa pagka-inosente sa maong mayor bahin sa balaod.

Kun nasayod man siya sa balaod apan iyang gitumban, usa ka butang nga angay niyang panubagan , matud pa ni Bragat.

Sa laing bahin si Jose Flores , usa sa mga opisyal sa INC gisukit sa Banat News kun ikiha ba nila og abuse of authority si Derama, siya nagkanayon nga ila pa kining hunahunaon.

Gibutyag niya nga wala sila’y laing tuyo sa pagwali sa ilang relihiyon didto sa Boljoon gawas sa pagpahibawo sa mga tawo sa maong lugar bahin sa kaluwasan sa kalag pag-abot sa adlaw sa paghukom.

Hinuon miingon siya nga ilang hangyoon pag-usab si Derama nga moabang sila sa sports complex sa lungsod kay nagtuo sila nga nasabtan na ni Derama kining gipasabot ni manlalaban Almendras “gawas lang kun uncivilized” gyud siya matud ni Flores. - Wen Celen (BANAT NEWS)