Taga MCWD gipasidunggan

CEBU, Philippines – Gihatagan og pasidungog sa kagamhanan sa dakbayan sa Sugbu kagahapong adlawa ang usa ka Senior Electrician sa Metropolitan Cebu Water District (MCWD) gumikan sa iyang kakugihan ug pagkamatinud-anon sa trabaho.

Ang nakadawat sa maong pasidungog isip “outstanding Cebuano worker” mao si Cesar Pelarca.

Si Pelarca na-inila sa iyang pagpakiglambigit sa mga kalihukang socio-civico nga giila usab sa Technical Education and Skills Development Authority (TESDA-7).

Labaw sa tanan, recipient usab si Pelarca sa President Magsaysay Outstanding Filipino Workers Award (wage-employed category) sa miaging tuig.

Kahinumduman nga si konsehal Edgardo Labella maoy mipalabang og resulosyon sa City Council alang sa paghatag og pasidungog kang Pelarca.

Ang kakugi ug pagkamatinud-anon ni Pelarca mao usab ang gusto ni acting mayor Michael Rama nga sundon sa mga opisyal ug mga kawani sa City Hall.

Sa iyang gihimong pakigpulong atol sa flag raising ceremony kagahapon gihagit ni Rama ang mga opisyal ug mga empleyado sa siyudad nga magtarong sa pagserbisyo.

Kini tungod usab sa mga taho nga padayong nadawat sa acting mayor nga may kalabutan sa mga ligoy ug badlongon nga mga kawani sa siyudad.

Matud ni Rama nga kun magsul-ob og uniporme dili kini angayang boling-bulingan pinaagi sa pagpabadlong.

Kung mahinumduman nga gihinginlan na sa acting mayor sa nakalabay'ng mga buwan ang badlongong mga kawani sa dakbayan.

Gani kini gipahinulsol usab ni Rama sa ilang dili maayong binuhatan atol sa pag-obserbar sa Semana Santa niadtong miaging buwan sa Marso. - Elly Bolonos (BANAT NEWS)