Gipusil sa nagmotor kritikal

CEBU, Philippines – Naangol ang usa ka minor de edad human kini pusila sa tulo ka wala hiilhing tawo nga nagsakay og motorsiklo didto sa barangay Basak, dakbayan sa Lapulapu niadtong miaging kaadlawon.

Ang biktima mao si Zaldy Monera Paquibot, 16, tinun-an sa Basak National High School night class, sa barangay Basak.

Si PO1 Renjie Fernandez sa homicide section sa kapolisan sa maong dakbayan nga nahinabi sa Banat News miingon nga kuyog sa biktima si Reynaldo Impas Buot, 18 , ulitawo nga iyang silingan, nga naglakaw paingon sa ilang balay dihang nasugatan nila ang tulo ka tawo nga nagsakay og motorsiklo.

Unya sa walay igong hinungdan gipamusil niini sila si Paquibot ug Buot, apan si Paquibot ray naigo sa hawak.

Gihatod dayon ngadto sa Mactan Doctor’s Hospital samtang padayon pang gipangita sa kapolisan ang mga kriminal. - Romeo T. Limpangog (BANAT NEWS)