Sunog sa Leon Kilat arson?

CEBU, Philippines – Gisuta sa kabomberohan ang pagkasunog ug pagkaugdaw sa SL ug Keen Lodge sa dalan Leon Kilat nga miangol og usa ka tawo niadtong Sabado sa gabii nga gidudahang gituyo pagsunog.

Si Cebu City Fire Marshal Ismael Codilla sa Bureau of Fire Protection nagkanayon nga giklaro lang nila kun unsay tinuod nga hinungdan sa maong sunog.

Ang mga giimbistigar ni Codilla mao si Ian Lerio, nga maoy nagdumala sa maong lodging house uban sa room boy niini nga si Enriquito Duhocarog .

Matud pa ni Codilla nga murag nagduda sila nga tinuyo ang maong sunog nga gihimo sa mga nanag-abang sa maong edipisyo.

Sa bahin usab ni Fire Investigator Roylin Maratas kini nagkanayon nga wala pa nila makuha ang mga lista sa mga tawo nga posibling maoy nagsunog sa maong building.

Kahinumduman nga hingpit gyung naabo ang unom ka establisamento sa Cebu United Investors Incorporated, diin nahilakip niini ang gamay'ng bahin sa   Gaisano South apan wala kini makaugdaw og mga butang sa maong tindahan.

Nakan-an usab sa kayo ang bintana sa 7th floor sa University of Cebu College Campus, ug naangol ang usa ka Randy Atis dihang giluwas niini ang pito ka tawo nga natanggong sulod sa Ceciles Enterprises nga kasikbit sa naugdaw nga SL ug Keen Lodge. - Lesley Caminade (BANAT NEWS)