Dalaga naghikog

CEBU, Philippines – Usa ka babaye kinsa gilikayan na sa iyang uyab, nagpusil patay sa iyang kaugalingon didto sa sitio Summerland, barangay Inayawan ning dakbayan sa Sugbo kagahapon sa alas 2:00 sa hapon.

Si Jackilyn Reyes, 30, dalaga nga taga sitio Tunob Lapuk, sa Inayawan nabuslot ang ulo dihang nasabak sa gikuptan niyang .38 kalibreng revolver.

Si Carding Daclan, hepe sa mga tanod sa Inayawan mibutyag sa Banat News nga ang bugtong nasayran nila sa hinungdan sa paghikog sa dalaga mao ang paglikaylikay na sa iyang hinigugma nga si Edsel Tiu kaniya.

Kagahapon sa alas 12:00 pasado sa udto, ang inahan ni Tiu midangop sa barangay hall sa Inayawan ug gipa-blotter ang matud pa hulga ni Reyes ngadto sa iyang anak.

Mibutyag ang inahan ni Tiu nga kun dili magpakita ang iyang anak kang Reyes adunay mahitabo niini o kaniya mismo ni Reyes.

Gibutyag usab sa inahan ni Tiu ngadto sa mga tanod nga wala siya masayod kun unsay hinungdan sa paglikay-likay sa iyang anak ngadto kang Reyes

Apan sa pagka-alas 2:00 pasado kagahapon sa hapon mipatim-aw kuno si Reyes ngadto sa gate sa balay nila ni Tiu.

Tungod kay wala si Tiu niadtong tungora, ang dalaga wala nalang mosulod sa balay sa iyang hinigugma, hangtod nga miabot ang mga barangay tanod nga gitawag sa inahan ni Tiu, kay nabalaka nga may dautang buhaton ang babaye.

Apan samtang nagpakisusi ang mga tanod bahin kang Reyes, kalit lang milanog ang buto sa armas ug maoy nakita nilang tanan si Reyes nga nahagba sa yuta ug nagkadugo na.

Natumba si Reyes ug nabugtoan sa gininhawa dihadiha dayon bunga sa bala sa armas de fuego nga gigamit niya sa paghikog.

Sa pagkakaron gisuta pa sa kapolisan sa dakbayan sa Sugbo kun wala bay foul play ang kamatayon ni Reyes ug sa pagsuta sa tinuod nga hinungdan sa paghikog niini. – BANAT NEWS